ايام قليلة جدا، وهنبدأ سنة جديدة كل عام وحضراتكم جميعا بخير.. وطبعا الكلام هيكون كتير فيها علي الذهب.. ياتري نبعت دلوقتي الذهب ولا نشتري.. والاسعار هتروح فين في 2025
المجالات الاقتصادية واحدة من الحاجات اللي بتشغل بال ناس كتير في كل الاوقات، وهتكون حديث الناس في الايام اللي جاية، خصوصا بعد قرار الفيدرالي الأمريكي بخفض اسعار الفايدة من جديد، وفي توقعات كتير بتقول أن البنك المركزي هياخذ قرار في الاجتماع اللي جاي واللي هيكون يوم 26 من شهر ديسمبر الحالي بفخض اسعار الفايدة خصوصا ان الفايدة بتستنزف جزء كبير جدا من الفلوس اللي موجودة في البنوك.
واحد من الحاجات اللي شغالة بال ناس كتير جدا حاليا هو اسعار الذهب في 2025، وهل هتواصل الارتفاع ولا الدنيا هتضبط شوية، والامور تكون في المتناول، والسؤال ده جاوب عليه كبري المؤسسات العالمية واللي اكدت علي ارتفاع أسعار المعادن من الذهب والفضة في الفترة اللي جاية وتحديدا السنة اللي جاية، والتوقعات رجحت تخطى سعر أونصة الذهب حاجز الـ 3000 دولار والفضة إلى 31 دولارا للأونصة.
طيب اسعار الذهب في مصر رايحة علي فين؟.
الدكتور وصفي واصف مستشار شعبة تعدين الذهب باتحاد الصناعات وخبير المشغولات الذهبية، توقع أن سعر الأونصة هيوصل لـ 3000 دولار في الفترة اللي جاية، وده أمر وارد جدا في البورصات العالمية.
مستشار شعبة تعدين الذهب باتحاد الصناعات وخبير المشغولات الذهبية، كمل كلامه وقال أن ارتفاع اسعار الذهب مرهون بمعدلات التضخم المرتفعة عالميا وحالة الاستقرار السياسي في الدول التانية، وقال أن كل ما المؤشرات كانت غير مستقرة هتكون أسعار الذهب مرتفعة في ظل المعدلات الاقتصادية والتضخم والصراعات السياسية اللي موجودة في اغلب دول العالم.
عدلي ميلاد عضو الغرف التجارية وأحد العاملين في قطاع الفضة، توقع ارتفاع الطلب على الفضة كمعدن في الفترة اللي جاية خصوصا مع زيادة دخولها في عدد كبير من الصناعات في الفترة اللي فاتت، وده اللي خلها سعرها ارتفع بشكل كبير في الايام اللي فاتت.
عضو الغرف التجارية كمل كلامه وقال أن سعر جرام الفضة بيسجل حاليا ما يقرب من 50 جنيهًا وممكن ترتفع فى الايام اللي جاية ويوصل لـ 100 جنيه في خلال سنتين من دلوقتي،وتوقع أن الاستثمار في السبائك الفضة هيبدأ من 5000 جنيه، والسبائك وزنها هيزيد وهتوصل لـ5 جرام وأكثر .
عدلي ميلاد، قال كمان أن الاستثمار في الفضة في الوقت الحالي ممتاز جدا خصوصا أن العميل بيكون عنده حرية الاختيار الشركة المناسبة له، أو المل اللي بيثق فيه علشان يشتري الفضة اللي هو عايزيخت سواء مشغولات أو سبائك، ده غير دخول الفضة في عدد كبير من الصناعات التكنولوجية الحديثة وده اللي عمل اقبال كبير جدا من الناس علي شرائها، وبالتالي اسعارها هتزيد اكبر في الفترات اللي جاية خصوصا مع زيادة توجهات الدولة للتوسع في الصناعة .
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
